ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་8%ལྷག་ཙམ་འཕར་བར་བྱ་རྒྱུ་དང་། གཏན་འཇགས་རྒྱུ་ནོར་མ་འཇོག་བྱེད་གྲངས་13%ལྷག་ཙམ་འཕར་བར་བྱ་རྒྱུ། སྤྱི་ཚོགས་ཀྱི་འཛད་རྫས་སིལ་འཚོང་བསྡོམས་འབོར་10%ལྷག་ཙམ་འཕར་བར་བྱ་རྒྱུ། གྲོང་ཁྱེར་དང་གྲོང་རྡལ་གྱི་གྲོང་མིའི་ཡོང་འབབ་འཕར་ཚད་དང་དཔལ་འབྱོར་འཕར་ཚད་གཞི་རྩའི་ཆ་ནས་གཅིག་མཚུངས་ཡོང་བར་བྱ་རྒྱུ། གྲོང་གསེབ་ཀྱི་ཡུལ་མིའི་ཡོང་འབབ་འཕར་ཚད་གྲོང་ཁྱེར་དང་གྲོང་རྡལ་གྱི་གྲོང་མི་ལས་མགྱོགས་པ་ཡོང་བར་བྱ་རྒྱུ། གྲོང་མིའི་འཛད་སྤྱོད་རིན་གོང་འཕར་ཚད་དང་གྲོང་ཁྱེར་དང་གྲོང་རྡལ་གྱི་ལས་ཤོར་ཐོ་འགོད་བྱེད་ཚད་3%དང་5%སོ་སོ་ནང་ཚུན་དུ་ཚོད་འཛིན་བྱ་རྒྱུ་སོགས་སྲིད་གཞུང་གི་ལས་དོན་སྙན་སྒྲོན་ནང་བཏོན་པའི་འདི་ལོའི་འཕེལ་རྒྱས་ཀྱི་སྔོན་དཔག་དམིགས་ཚད་གཙོ་བོར་དམིགས་ཏེ་འཐུས་མི་དང་ཨུ་ཡོན་ཚོས་གྲོས་བསྡུར་འཁྲུག་པོ་གནང་བ་རེད།

“དེ་རིང་སྔ་དྲོར། རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་གནང་བའི་སྲིད་གཞུང་གི་ལས་དོན་སྙན་སྒྲོན་ནན་ཏན་ངང་ཉན་པ་ཡིན། ལྷག་པར་དུ་སྲིད་གཞུང་གི་ལས་དོན་སྙན་སྒྲོན་ནང་བཏོན་པའི་ཚོང་གཉེར་ཁོར་ཡུག་མུ་མཐུད་ལེགས་སུ་གཏོང་རྒྱུ་དང་། སྲིད་གཞུང་གི་གྲངས་འཛིན་ཅན་ཕྱོགས་སྒྱུར་མགྱོགས་པོ་བྱ་རྒྱུ། ‘ཡིད་རྟོན་སྲིད་གཞུང་འཛུགས་སྐྱོང་ལོའི’ཆེད་དོན་བྱ་སྤྱོད་སྤེལ་རྒྱུ། གཉེར་སྐྱོང་བྱེད་པོའི་ཁྲིམས་མཐུན་ཁེ་དབང་ལ་གནོད་འཚེ་གཏོང་བའི་སྲིད་གཞུང་གི་བྱ་སྤྱོད་ཚང་མ་དག་ཐེར་མཐའ་གཅིག་ཏུ་བྱ་རྒྱུ། ལྡོག་ཕྱོགས་ཀྱི་དཔེ་མཚོན་ཚང་མ་ཡོངས་བསྒྲགས་དང་བརྡ་ཁྱབ་གཏོང་རྒྱུ་སོགས་ཀྱི་བྱ་ཐབས་རབ་དང་རིམ་པ་ཐོས་རྗེས། སླད་ཕྱིན་གྱི་འཕེལ་རྒྱས་ཐད་རང་ལྗོངས་ཀྱི་ཁེ་ལས་ཀྱི་ཡིད་ཆེས་སྔར་བས་ཆེ་རུ་ཕྱིན་ཡོད། གོམ་སྟབས་རྗེས་མར་ང་ཚོས་སྲིད་གཞུང་གི་ལས་དོན་སྙན་སྒྲོན་ནང་བཏོན་པའི་དམིགས་ཚད་དང་བླང་བྱར་གཞིགས་ནས་འབད་འཐབ་ཧུར་ཐག་བྱེད་ཀྱི་ཡིན”ཞེས་བསྟན་འཛིན་ནོར་བུས་གསུངས་པ་རེད།

སྲིད་གཞུང་གི་ལས་དོན་སྙན་སྒྲོན་ནང་། 2024ལོར་རང་ལྗོངས་ཀྱིས་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་གནད་ལ་འཁེལ་བའི་སྒོ་ནས་ལག་བསྟར་བྱེད་དགོས་ཞེས་བཏོན་ཡོད།

རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་དང་། རང་སྐྱོང་ལྗོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ། ཉིང་ཁྲི་རུན་ཤིན་དངོས་ལས་ཚད་ཡོད་ཀུང་སིའི་ཏུང་ཧྲི་ཀྲང་བཅས་ཡིན་པའི་ཧན་ཡུས་ཀྱིས། ངས་གོ་ཤེས་ཐུབ་པའི་འཕེལ་རྒྱས་ཀྱི་འདུ་ཤེས་གསར་པ་དེའི་ནང་ཁེ་ལས་ཀྱི་ལྗང་མདོག་འཕེལ་རྒྱས་ཚུད་ཡོད། “ཚད་དང་མཐུན་པའི་ཁེ་ལས་མཁས་ཅན་ཞིག་བྱེད་པར། ངེས་པར་དུ་འདུ་ཤེས་གསར་བརྗེས་དང་དུས་རབས་རྗེས་སྙེག་གིས་ལྗང་མདོག་སྐྱེ་ཁམས་རྒྱུན་མཐུད་འཕེལ་རྒྱས་ཀྱི་ལམ་བུར་བསྐྱོད་རྒྱུ་མཐའ་འཁྱོངས་བྱས་ཏེ། དར་རྒྱས་ཆེ་བའི་ས་ཁུལ་གྱི་ཉམས་མྱོང་ཡག་པོ་དང་བྱེད་ཐབས་ཡག་པོ་སློབ་སྦྱོང་དང་ནང་འདྲེན་གྱིས་འདུ་ཤེས་གསར་པར་བརྟེན་ནས་ཐོན་སྐྱེད་ནུས་ཤུགས་འཕེལ་རྒྱས་ལ་སྐུལ་འདེད་གཏོང་དགོས”ཞེས་གསུངས་པ་རེད།

རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་ལྷ་ས་གྲོང་ཁྱེར་ཁྲེང་ཀོན་ཆུས་མི་སྤྱི་ཅུས་ཀྱི་མཐོ་རིམ་བཟོ་བཀོད་པ་ཕུའུ་ལི་ལི་ཡིས། 2024ལོར་སྲིད་གཞུང་གི་ལས་དོན་སྙན་སྒྲོན་ནང་གི་བླང་བྱ་ལྟར་ལྷ་ས་གྲོང་ཁྱེར་མི་སྤྱི་ཅུས་ཀྱིས་ལས་ཞུགས་འབབ་འཕར་ལ་དམ་འཛིན་ནན་པོ་བྱེད་པ་དང་། མཐོ་སློབ་སློབ་ཐོན་སློབ་མ“ཚོགས་སྒྲིག་རྣམ་པའི”སྒོ་ནས་ལྗོངས་ཕྱིར་ལས་ཞུགས་བྱེད་པའི་བྱེད་སྟངས་གསར་པ་ཁྱབ་གདལ་གཏོང་བ། ཁྲོམ་ར་ཅན་གྱི་ལས་ཞུགས་ཐབས་ལམ་གསར་པ་ཕྱོགས་ཡོངས་ནས་རྒྱ་སྐྱེད་གཏོང་བ་བཅས་བྱས་ནས་ཐོན་ལས་གསར་པའི་བཟོ་པ་གསོ་སྐྱོང་ཤུགས་ཆེན་དང་ཞིང་འབྲོག་པའི་ལས་ཞུགས་གཞན་སྒྱུར་རྩ་འཛུགས་ཅན་གྱི་ཆུ་ཚད་མཐོ་རུ་ཤུགས་ཆེན་གཏོང་གི་ཡིན་ཞེས་གསར་འགོད་པར་གསུངས་བྱུང་།

སྲིད་གཞུང་གི་ལས་དོན་སྙན་སྒྲོན་ནང་བསྟན་དོན། 2023ལོར་རང་ལྗོངས་ཀྱིས་བརྟག་དཔྱད་ཞིབ་འཇུག་ཧུར་ཐག་བྱས་ནས་དངོས་ཡོད་གནད་དོན་6100ལྷག་ཙམ་ཐག་གཅོད་བྱས་ཡོད།

“རྒྱང་ལམ་གསར་པ་དང་འགོ་འཛུགས་ས་གསར་པར་ང་ཚོས་བརྟག་དཔྱད་ཞིབ་འཇུག་ལ་བརྟེན་ནས་ལམ་གཤོང་རྒྱུ་སྔར་བས་མཐའ་འཁྱོངས་ཀྱིས་བོད་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ཀྱི་ལས་འགན་ཨང་དང་པོ་འདིར་དམ་པོར་དམིགས་ནས། བརྟག་དཔྱད་ཞིབ་འཇུག་གི་སྤུས་ཚད་མཐོ་རུ་དང་སྲིད་འདོན་ཇུས་འབུལ་གྱི་ནུས་པ་ཆེ་རུ་གཏོང་གི་ཡིན”ཞེས་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་རྒྱལ་ཁབ་བསྡོམས་རྩིས་ཅུས་བོད་ལྗོངས་བརྟག་དཔྱད་སྤྱི་ཁྱབ་རུ་ཁག་གི་ཏང་ཙུའི་ཧྲུའུ་ཅི་དང་སྤྱི་ཁྱབ་རུ་དཔོན་པ་སངས་ཀྱིས་གསུངས་པ་རེད།

འགོ་འཛུགས་ས་གསར་པ་དང་རྒྱང་ལམ་གསར་པར་མི་དམངས་འཐུས་ཚོགས་ཀྱི་འཐུས་མི་དང་སྲིད་གྲོས་ཀྱི་ཨུ་ཡོན་ཚོས། སླད་ཕྱིན་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་མཐའ་འཁྱོངས་ཀྱིས་ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག མཐུན་སྒྲིལ་ལ་བརྟེན་ནས་སྟོབས་ཤུགས་གཅིག་ཏུ་སྒྲིལ་བ་དང་འབད་འཐབ་ལ་བརྟེན་ནས་ཕུགས་འདུན་བསྒྲུབས་ཏེ། རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེའི་ཆེད་དུ་ལེགས་སྐྱེས་གསར་པ་འབུལ་གྱི་ཡིན་ཞེས་གཅིག་རྗེས་གཉིས་མཐུད་ངང་གསུངས་པ་རེད།