གཞི་རིམ་གྱི་ལས་བྱེད་པ་ཞིག་གི་ངོས་ནས་རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་ཆབ་མདོ་གྲོང་ཁྱེར་རི་བོ་ཆེ་རྫོང་ཨུད་ཀྱི་ཧྲུའུ་ཅི་གཞོན་པ་རྫོང་དཔོན་དགའ་གཡུང་ལ་འདས་ཟིན་པའི་ལོ་གཅིག་རིང་རི་བོ་ཆེ་རྫོང་གི་མི་སེར་གྱི་འཚོ་བ་ཡར་ངོའི་ཟླ་ལྟར་འཕེལ་རྒྱས་ཕྱིན་པར་མྱོང་ཚོར་ཟབ་མོ་བྱུང་ཡོད།

“གྲངས་གཞི་ལས་གསལ་ཤོས་ཤེས་ཐུབ” དགའ་གཡུང་གིས། 2023ལོར་ཁེ་ལས་9རྫོང་ཐོན་ལས་གླིང་དུ་བཅའ་སྡོད་བྱས་པས་སྔོན་དཔག་ལྟར་ན་ལོའི་ཐོན་རྫས་རིན་ཐང་སྒོར་དུང་ཕྱུར་1.6ལྷག་ཙམ་ཟིན་རྒྱུ་དང་། ཐོན་ལས་རྣམ་གྲངས་བརྒྱུད་མི་ཐེངས་ཁྲི་1.5ལྷག་ཙམ་ལས་ཞུགས་ཐུབ་ནས་འབབ་འཕར་སྒོར་ཁྲི་7900ལྷག་ཙམ་ཡོང་བར་སྐུལ་ཁྲིད་ཐུབ་པ། ཆབ་མདོ་གྲོང་ཁྱེར་གྱི་གཙང་གསུམ་ཇ་རྟའི་རིག་གནས་སྒྱུ་རྩལ་དུས་ཆེན（རི་བོ་ཆེའི་ཚོགས་ར）སྐབས་དགུ་པ་བདེ་བླག་ངང་གཉེར་ནས་རིམ་རྩིས་བརྒྱབ་ན་ཚོང་འགུགས་མ་འདྲེན་གྱི་དངུལ་འབོར་སྒོར་ཁྲི་5849.53ཟིན་པ། ཁྱོན་ཡུལ་སྐོར་བ་མི་ཐེངས་ཁྲི་6.7ལ་སྣེ་ལེན་ཞུས་པའི་ཡུལ་སྐོར་ཡོང་འབབ་སྒོར་ཁྲི་1000ལྷག་ཙམ་བྱུང་ཡོད་ཅེས་གསར་འགོད་པར་གསུངས་བྱུང་།

རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་ཞིག་གི་ངོས་ནས་དགའ་གཡུང་གིས་དམངས་འཚོར་མཐའ་གཅིག་ཏུ་བརྩེ་བ་ཟབ་མོ་འཆང་གནང་གི་ཡོད། 2023ལོར་ཁོང་གིས་སྔ་རྗེས་སུ་ཐག་རིང་ཤང་དང་གྲོང་རྡལ་དང་གྲོང་ཚོར་ཐེངས་40ལྷག་ཙམ་ཕེབས་ཏེ། མི་དམངས་ཀྱི་དགོས་མཁོ་དང་འདུན་པ་ཤེས་རྟོགས་གནང་ནས་བརྟག་ཞིབ་སྙན་ཞུ་7བཟོས་གནང་བ་མ་ཟད། ཆབ་མདོ་གྲོང་ཁྱེར་གྱི་རིམ་ཁག་མི་དམངས་འཐུས་ཚོགས་དང་དེའི་རྒྱུན་ལས་ཨུ་ལྷན་ལ་ཐབས་དང་ཇུས་10ལྷག་ཙམ་ཕུལ་ཏེ། “མི་དམངས་ཀྱིས་ང་འཐུས་མིར་བདམས་པས་ངས་མི་དམངས་ཀྱི་དོན་དུ་བྱ་བ་སྒྲུབ་པའི”དམ་བཅའ་བརྟན་པོ་བྱ་སྤྱོད་དངོས་ཀྱི་ཐོག་ནས་དོན་འཁྱོལ་གནང་བཞིན་ཡོད།

“མི་སེར་ལ་ཁ་ཡོད་ལག་ཡོད་ཀྱི་ཕན་པ་ཐོབ་པ་བྱ་རྒྱུ་ནི་མི་དམངས་འཐུས་ཚོགས་ཀྱི་འཐུས་མིའི་འགན་སྒྲུབ་ལ་ཞིབ་དཔྱད་བྱེད་པའི་ཚད་གཞི་རེད” དགའ་ཡུང་གིས། ངས་མི་དམངས་མང་ཚོགས་ཀྱི་རེ་བ་ཟབ་མོ་ཆུད་ཟོས་སུ་མི་གཏོང་བར་སེམས་ནུས་ཡོད་རྒུས་དམངས་ཀྱི་ཆེད་དུ་བྱ་བ་དངོས་སྒྲུབ་པ་དང་ལྷག་བསམ་རྣམ་དག་གིས་ཆབ་མདོའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་འབུལ་རྒྱུ་ཡིན་ཞེས་གདེང་ཚོད་ཆེན་པོས་གསུངས།