ཀ་རུའི་མདངས་ལྡན་ལྷག་བསམ་རྣམ་དག་སྒོས།།

ཁ་བའི་ལྗོངས་ཀྱི་བསམ་ཤོད་རྒན་པོ་ངས།།

ག་བཤད་ཚིག་སྙན་སྡེབ་ལེགས་མི་ཤེས་ཀྱང་།།

ང་ཡི་ཀྲུང་ཧྭ་དར་རྒྱས་གླུ་རུ་ལེན།།

ཅ་གས་རབ་བསྐྱངས་ང་དྲུག་མི་རིགས་ནི།།

ཆ་ལུགས་རིག་གནས་ཐ་དད་སོ་སོ་ཡང་།།

ཇ་དང་མར་གྱི་མཉམ་འདྲེས་གཅིག་མཐུན་ལས།།

ཉ་གང་ཟླ་བཞིན་འཕེལ་བའི་ཀྲུང་ཧྭ་རྒྱལ།།

ཏ་ལ་ལ་འདྲའི་གུང་ཁྲན་ཏང་གིས་ནི།

ཐ་ཆད་དབུལ་ཕོངས་ཕ་མཐར་སྤྱུགས་དང་ལྷན།།

ད་ལྟའི་འབྱོར་འབྲིང་མངོན་མཐོ་ངེས་ལེགས་དཔལ།།

ན་རྒས་སྤོ་བོས་མཐོང་དུས་ཀྲུང་ཧྭ་རྒྱལ།།

པ་ཏྲའི་རིས་བཞིན་རི་སྔོ་ཆུ་དྭངས་ཞེས།།

ཕ་མེས་དུས་ཀྱི་འཛིན་མའི་ས་འཛིན་ཆེ།།

བ་གམ་རི་ཚོགས་གསེར་གྱི་ལྷུན་པོ་ནི།།

མ་བཅོས་ལྷུན་གྲུབ་སྔར་གནས་ཀྲུང་ཧྭ་རྒྱལ།།

ཙ་ན་ཡིན་ཡང་དེང་གི་ཆབ་དཔལ་རིག།

ཚ་ཟེར་མེ་ཟླུམ་མཁའ་ལ་འཚེར་བའི་ཚེ།།

ཛ་ལང་རྨོངས་དད་སྨག་མུན་བཅོམ་དང་ལྷན།།

ཝ་ལེར་གསལ་མཛད་ཚན་རྩལ་ཀྲུང་ཧྭ་རྒྱལ།།

ཞ་སྒྲེ་དམུས་ལོང་རྐང་ཞ་ལག་འཐེང་སོགས།།

ཟ་འདྲེའི་ནད་ཀྱིས་གཙེས་པའི་མི་རྣམས་ཀྱང་།།

འ་ཆད་འུ་ཐུག་གནས་སུ་གྱར་བའི་ཚེ།།

ཡ་མཚན་བདེ་བར་བཅོས་པ་ཀྲུང་ཧྭ་རྒྱལ།།

ར་རྒན་གསེར་བརྫུས་མ་ཡིན་དམངས་དོན་ཆེད།།

ལ་འུར་གཡུལ་སར་འབྱོར་བའི་བུ་ཕྲུག་དམག །

ཤ་ཁྲག་སྤུན་ལས་ཟབ་པའི་མཛངས་སྤྱོད་ནི།།

ས་གསུམ་སྲུང་འཛིན་ལྷ་དམག་ཀྲུང་ཧྭ་རྒྱལ།།

ཧ་ཅང་བརྗོད་པར་འདོད་པའི་གཏམ་འདི་ཀོ།

ཨ་མའི་ཨོ་ལོ་བསམ་ཤོད་མིང་ཅན་པས།།

ཀ་བཞི་གདུང་བརྒྱད་མིན་པའི་ཤག་ཆུང་ནས།།

ཁ་མཚར་མ་ཡིན་སེམས་ཀྱིས་བླངས་འདི་དགེའོ།།