ལྷག་བསམ་འོ་མའི་མཚོ་མོའི་ནང་།།
དུང་སེམས་སྙན་ངག་འཁྱིལ་བ་བཞིན། །
རབ་དཀར་ཆུ་ཟླའི་ངོ་གདོང་གིས། །
དགའ་སྤྲོའི་འཛུམ་རིས་དྭངས་མོ་བྲིས། །
རབ་གསལ་རི་མོའི་ལོ་ཚིགས་ལ།།
ལོ་མགོ་རྒྱལ་སྲིད་སྣ་བདུན་བཞག །
ལོ་གཡང་བཀྲ་ཤིས་མགུར་མ་བླངས།།
གནམ་ལོ་གསར་པའི་དུས་སྟོན་བསུས། །
གར་མས་ཟློས་གར་འཁྲབ་པའི་དུས།།
གཤིས་བཟང་བུ་མོའི་ལང་ཚོ་མཛེས།།
མཛེས་པའི་སྨོན་ཚིག་རིང་མོ་ཡང་།།
སྨན་ཆུང་གཞོན་ནུའི་མགུལ་དུ་དཔྱངས། །
ཉམས་ལ་ཕུན་སུམ་ཚོགས་པའི་ཉམས། །
གཤིས་ལ་བག་བྲོ་ཡོང་བའི་གཤིས།།
དགའ་སྟོན་དུས་བཟང་ལོ་གསར་ལ།།
བསོད་ནམས་ཡར་འགྲོའི་གླུ་ཞིག་ལེན། །
འཛུམ་གྱི་ཉི་གཞོན་ཚེས་དང་ལྷན།།
ཡིད་ཀྱི་སྨུག་པ་རང་སར་དེངས།།
དཔལ་འཛོམས་རོལ་བའི་དུས་སྟོན་ཉིད། །
བསུ་བའི་སེམས་པ་མངོན་དུ་ཕྱོགས།།
སྨོན་འདུན་ཞུ་འཕྲིན་དཀར་པོ་ཡིས།།
ཚེས་གཅིག་ཞོགས་པ་འཛུམ་གྱིས་དྲངས། །
ཚེས་གཉིས་དགའ་འཛོམས་དགའ་སྟོན་ལ། །
བསུ་བར་བྲེལ་བའི་སྟ་གོན་བྱས།།
ཙན་དན་སྨུག་པོའི་ལྕོག་ཙེའི་སྟེང་།།
གསེར་དངུལ་ཕྲ་མའི་དཀར་ཡོལ་བཞག །
བདུད་རྩི་འོ་ཇ་དཀར་པོས་བཀང་།།
ལྷན་འཛོམས་དུས་བཟང་ཉིན་མོར་བཞེས། །
ཕ་དང་ཁུ་བོའི་དགོད་སྒྲ་སྒྲོག།
མ་དང་སྲིང་མོས་གླུ་གཞས་ལེན།།
སྤུན་དང་ནུ་བོས་བྲོ་གར་འཁྲབ།།
དགའ་འཛོམས་དུས་སྟོན་སྐྱིད་ལ་རོལ།།
རི་མོའི་དྲྭ་བ་དྲྭ་ཕྱེད་ལས།།
མུ་ཏིག་ཕྲ་རྒྱན་ཕྲ་མ་ཅན།།
རྨ་བྱའི་སྒྲོ་མདོངས་མཛེས་པོ་བཞིན།།
རིན་ཆེན་དར་གོས་བཟང་པོས་བརྒྱན། །
སྨན་ཆུང་གཟུགས་མཛེས་ཤ་ར་ར།།
གཞོན་ནུའི་འཛུམ་མདངས་བག་བྲོ་བྲོ།།
བཞུགས་གྲལ་སྒོར་མོ་འཁྲུག་ཤིག་ཤིག །
བཀྲ་ཤིས་ལོ་གསར་དགའ་ལྷང་ལྷང་།།
རླུང་རྟའི་དར་ལྕེ་གཡོ་བའི་དུས།།
མཚན་སྙན་སྐྱི་བསེར་རླུང་བུ་ལྡང་།།
སྙན་པའི་སྙན་ཚིག་ཁྲི་འབུམ་གྱིས།།
མཚན་བཟང་བཀྲ་ཤིས་རྟགས་བརྒྱད་ཕབ། །
ཤེས་རབ་གློག་གི་འཁྱུག་རྩལ་ལས།།
ཤེས་བྱའི་ཡོན་ཏན་སྣ་ཚོགས་འཁྲུངས། །
སྤྱོད་བཟང་ཡོན་ཏན་བྱེ་བའི་མཛོད། །
འཕྲིན་ལས་དར་བའི་ལོ་གསར་བསུ།།
ལྷན་འཛོམས་དགྱེས་པའི་ཉིན་བཟང་ཡིན། །
དགའ་སྟོན་བསུ་བའི་དུས་བཟང་ཡིན། །
གནམ་ལོ་གསར་པ་སྨོན་ཚིག་གིས།།
ཡང་ཡང་བསུས་པས་རྟེན་འབྲེལ་ལེགས། །