“2023ལོར། ང་ཚོས་རྒྱུན་མཐུད་འབད་འཐབ་དང་འབད་འབུངས་མདུན་སྐྱོད་བྱས་ཤིང་། དཀའ་ངལ་སྣ་ཚོཊ་ཁྱད་དུ་བསད་པ་དང་། མཛེས་སྡུག་ལྡན་པའི་མདུན་ལམ་མཐོང་ནས། ལྗིད་ཏིག་ཏིག་གི་གྲུབ་འབྲས་ཐོབ་ཡོད། ཚང་མས་ལོ་འདི་ལས་སླ་པོ་ཞིག་མིན་པ་བློ་ལ་ངེས་ཤིང་། མ་འོངས་པར་ཡང་གདེང་ཚོད་ཀྱིས་ཁེངས་བཞིན་ཡོད” 2024ལོའི་ལོ་གསར་གྱི་སྔ་ནུབ་ཏུ་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ལོ་གསར་གྱི་ཤིས་ཚིག་གསུང་སྐབས། འདས་ཟིན་པའི་ལོ་གཅིག་ནང་ཐོག་མའི་བསམ་འདུན་གྱི་རྒྱུན་བསྐྱངས་ནས་འབད་བརྩོན་ལྷོད་མེད་བྱས་པ་གསོན་ཉམས་དོད་པོས་གསུངས་པ་དང། རླབས་ཆེན་གྱི་མེས་རྒྱལ་དར་རྒྱས་དང་བསྐྱར་དར་གྱི་ཕྱོགས་སུ་གོམ་སྟབས་བརྟན་པོས་བསྐྱོད་པར་བརྩེ་བ་ཟབ་མོས་ཕྱིར་དྲན་གནང་ཡོད། རང་ལྗོངས་ཀྱི་རྒྱ་ཆེའི་ལས་བྱེད་པ་དང་མང་ཚོགས་ཀྱིས་ཀྲུའུ་ཞི་ཞི་ཅིན་ཕིང་གི་2024ལོའི་ལོ་གསར་གྱི་ཤིས་ཚིག་གི་དགོངས་དོན་ནན་ཏན་ཉན་པ་དང་སློབ་སྦྱོང་བྱས་རྗེས། ཚང་མས། ལོ་གསར་པར་དཔའ་ངར་ཆེར་བསྐྱེད་ཀྱིས་མདུན་སྐྱོད་ཀྱི་བསམ་པའི་ཉམས་གྱུར་མུ་མཐུད་རྒྱུན་བསྐྱངས་ནས། བསམ་བློ་གཏོང་ས་གཅིག་ལ་གཏོང་བ་དང་ཤུགས་རྒྱག་ས་གཅིག་ལ་བརྒྱབ་སྟེ་རང་ཉིད་ཀྱི་ལས་གནས་སུ་འབད་བརྩོན་ལྷོད་མེད་བྱས་ནས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་རང་ཉིད་ཀྱི་སྟོབས་ཤུགས་སྐྱེས་སུ་འབུལ་གྱི་ཡིན་ཞེས་གཅིག་རྗེས་གཉིས་མཐུད་ངང་བརྗོད།

ཀྲུང་གོ་ལྕགས་ལམ་མཚོ་བོད་ཚོགས་པ་ཚད་ཡོད་ཀུང་སི་ལྷ་ས་མེ་འཁོར་བབས་ཚུགས་ཀྱི་ལས་དོན་པ་སྐལ་བཟང་དབྱངས་ཅན་གྱིས་2023ལོར་ཚང་མས་ནུས་ཤུགས་ཡོད་རྒུས་ལོ་ཧྲིལ་པོའི་ལས་འགན་དང་དམིགས་ཚད་ལེགས་གྲུབ་ཟིན་པ་དང་།

(པར་ངོས་གསུམ་པར་གཟིགས)(པར་ངོས་དང་པོར་མཐུད) བདེ་འཇགས་དང་། སྤུས་ཚད། ཕན་འབྲས་བཅས་ལེགས་སུ་བརྟན་པོ་ཕྱིན་ཡོད། མདོར་ན། དེ་ནི་ཀྲུའུ་ཞི་ཞི་ཅིན་ཕིང་གིས“གྲུབ་འབྲས་ལྗིད་ཏིག་ཏིག་ཐོབ་ཡོད”ཅེས་གསུངས་པ་ལྟར་བྱུང་ཡོད། ལོ་གསར་པར་ང་ཚོས་མུ་མཐུད་ནས་ཐོག་མའི་བསམ་འདུན་བརྟན་སྲུང་གིས་རང་ཉིད་ཀྱི་ལས་ཀ་ཏན་ཏན་ཏིག་ཏིག་བསྒྲུབ་པ་དང་། དཔེ་དེབ་མང་ཙམ་ཀློག་པ་དང་སློབ་སྦྱོང་མང་ཙམ་བྱས་ནས་རང་ཉིད་ཕྱོགས་ཡོངས་ནས་ཡར་རྒྱས་ཡོང་བར་བྱས་ཏེ་དེ་བས་མཛེས་སྡུག་ལྡན་པའི་འབྱུང་འགྱུར་ཕྱོགས་སུ་བསྐྱོད་ཀྱི་ཡིན་ཞེས་བརྗོད།

ལྷ་སར་ལས་ཀ་བྱེད་བཞིན་པའི“95ནང་སྐྱེས”ཀྱི་ཚེ་སྐྱིད་2024ལོའི་རྒྱལ་ཡོངས་ཀྱི་གནམ་ལོ་གསར་ཚེས་ཀྱི་རི་འཛེགས་ལུས་སྦྱོང་ཚོགས་ཆེན་གྱི་བོད་ལྗོངས་ཡན་ལག་ཚོགས་རའི་བྱེད་སྒོར་ཞུགས་པ་རེད། ཁོང་གིས། ད་ཐེངས་བྱེད་སྒོར་ཞུགས་པ་བརྒྱུད་ངས་ཀྲུའུ་ཞི་ཞི་ཅིན་ཕིང་གི་ལོ་གསར་གྱི་ཤིས་ཚིག་ལ་གོ་བ་དེ་བས་གཏིང་ཟབ་པ་ལེན་ཐུབ་བྱུང་། མི་ཚེ་ནི་རི་འཛེག་པ་དང་འདྲ་བར་འཛེགས་དུས་ཁག་ཙམ་ཡོད་རུང་རི་རྩེར་སླེབས་ཚེ་དེ་བས་མཛེས་སྡུག་ལྡན་པའི་ཡུལ་ལྗོངས་མཐོང་ཐུབ་པ་ཡིད་ལ་འཁོར་ཚེ་སྒུལ་ཤུགས་དང་ཡིད་ཆེས་འཕེལ་གྱི་འདུག འདི་ནི་དཀའ་ལས་རྒྱག་རིན་ཡོད་པའི་ལས་ཀ་ཞིག་རེད་ཅེས་བརྗོད།

“2023ལོ་ནི་ང་ལ་འབྲས་བཟང་ཐོབ་པའི་ལོ་ཞིག་ཡིན། ལོ་འདིར་ཀུང་སི་དངོས་སུ་འཛུགས་ཐུབ་པ་མ་ཟད། ད་དུང་རང་ཉིད་ཀྱི་ཤ་གསོས་ཀྱི་སྤུས་རྟགས་ཀྱང་ཐོ་འགོད་ཐུབ་བྱུང”བོད་ལྗོངས་ཡིད་འོང་མ་ཚོང་དོན་ཚད་ཡོད་ཀུང་སིའི་འགན་འཁུར་བ་མཚམས་བརྟན་སྒྲོལ་དཀར་གྱིས། “90ནང་སྐྱེས”ཀྱི་ལས་གཏོད་པ་ཞིག་ཡིན་པའི་ངོས་ནས་སླད་ཕྱིན་མུ་མཐུད་འབད་བརྩོན་བྱས་ནས་ཀུང་སི་འཕེལ་རྒྱས་ཡག་པོ་གཏོང་བ་དང་གཞི་ཁྱོན་ཆེ་རུ་བཏང་སྟེ། རང་ཉིད་དང་འདྲ་བར་ལས་གཏོད་ཀྱི་བསམ་པ་ལྡན་མཁན་ཁག་གཅིག་ལས་སྒྲུབ་ལས་གཏོད་བྱེད་པར་སྐུལ་ཁྲིད་བྱེད་ཀྱི་ཡིན་ཞེས་བརྗོད།

ནག་ཆུ་གྲོང་ཁྱེར་ལྷ་རི་རྫོང་མེ་ཟོན་རོགས་སྐྱོབ་རུ་ཆེན་གྱི་བཀོད་འཐབ་པ་ཐའོ་དབྱང་གིས། འདས་ཟིན་པའི་ལོ་གཅིག་རིང་ལྷ་རི་རྫོང་མེ་ཟོན་རོགས་སྐྱོབ་རུ་ཆེན་གྱིས་ལས་སྒྲུབ་གྲ་སྒྲིག་དང་། རྩལ་ནུས་སྦྱོང་བརྡར། མེ་སྐྱོན་འགོག་ཟོན། ཚད་ལྡན་ཅན་འཛུགས་སྐྱོང་སོགས་ཀྱི་དམིགས་ཚད་དང་ལས་འགན་ལ་དམ་པོར་དམིགས་ནས། དངོས་འཛིན་དངོས་སྒྲུབ་དང་འགག་སྒྲོལ་དཀའ་སེལ་གྱིས་བྱེད་ཐབས་རབ་དང་རིམ་པ་བརྒྱུད། མང་ཚོགས་ཀྱི་མེ་ཟོན་བདེ་འཇགས་ཀྱི་འདུ་ཤེས་ཟབ་ཏུ་དང་རང་འགོག་རང་སྐྱོབ་ཀྱི་འཇོན་ཐང་ཆེ་རུ་ཟབ་ཏུ་བཏང་ནས་ཁོངས་གཏོགས་ཁུལ་གྱི་མེ་སྐྱོན་གྱི་དུས་བབ་བརྟན་པོ་ཡོང་བར་རྨང་གཞི་བརྟན་པོ་བཏིང་ཡོད་ཅེས་བརྗོད་ཅིང་། ཁོང་གིས། 2024ལོར་ང་ཚོས་གཞི་རིམ་གྱི་བཀོད་འཐབ་པའི་སྤྱི་ཡོངས་ཀྱི་རྩལ་ནུས་ཆུ་ཚད་ཟམ་མི་ཆད་པར་མཐོ་རུ་དང་ལས་འཛོལ་ཐག་གཅོད་བྱེད་ནུས་ཆེ་རུ་བཏང་ནས། “སྐོང་ན་འཛོམས་ཐུབ་པ་དང་འཐབ་ན་རྒྱལ་ཐུབ་པའི”འཕྲལ་སྡོམ་རོགས་སྐྱོབ་ཀྱི་ཆེད་ལས་དཔུང་ཁག་ཧུར་ཐག་བཏོད་པ་དང་མེ་སྐྱོན་སྔོན་འགོག་ཚོད་འཛིན་གྱི་ལམ་སྲོལ་ནན་དུ་བཏང་སྟེ། བོད་ཀྱི་མེ་ཟོན་བྱ་གཞག་ལ་སྟོབས་ཤུགས་ལེགས་སྐྱེས་འབུལ་བ་དང་། རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གཡས་གཞོགས་གཡོན་འདེགས་བྱེད་ཀྱི་ཡིན”ཞེས་བརྗོད།

（རིག་རྡོར་དང་པ་ཕན་གྱིས་སྒྱུར་ཞུས་བྱས）