ཤིན་ཧྭ་གསར་འགྱུར་ཁང་པེ་ཅིང་ནས་ཟླ་1ཚེས་1ཉིན་གློག་འཕྲིན་འབྱོར་གསལ། ཟླ་1ཚེས་1ཉིན་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཁྲའོ་ཞན་ངལ་རྩོལ་ཏང་གི་སྤྱི་ཁྱབ་ཧྲུའུ་ཅི་དང་རྒྱལ་དོན་ཨུ་ཡོན་ཀྲང་ཅིན་ཀྲེང་ཨེན་དང་ལོ་གསར་གྱི་རྟེན་འབྲེལ་གློག་འཕྲིན་གཏོང་རེས་གནང་སྟེ། 2024ལོ“ཀྲུང་ཁྲའོ་མཛའ་མཐུན་ལོར”གཏན་འཁེལ་གནང་བ་མ་ཟད། བྱེད་སྒོ་རབ་དང་རིམ་པ་སྤེལ་རྒྱུའི་ཁྱབ་བསྒྲགས་གནང་བ་རེད།

ཞི་ཅིན་ཕིང་གིས་བསྟན་དོན། ཀྲུང་ཁྲའོ་ནི་རི་ཀླུང་འབྲེལ་བའི་མཛའ་མཐུན་གྱི་ཁྱིམ་མཚེས་རྒྱལ་ཁབ་ཅིག་རེད། ཏང་གཉིས་དང་རྒྱལ་ཁབ་གཉིས་ཀྱི་འགོ་ཁྲིད་པ་རྒན་རབས་སྐུ་ངོ་མས་བཏོད་གནང་བའི་ཀྲུང་ཁྲའོ་དབར་གྱི་མཛའ་གྲོགས་ཁྲག་དང་མེ་ལྕེའི་གསར་བརྗེའི་འཐབ་རྩོད་ནང་གོང་བུ་གཅིག་འགྲིལ་དང་ཞུན་བརྡར་ཐེབས་ཡོད་ལ། སྤྱི་ཚོགས་རིང་ལུགས་འཛུགས་སྐྲུན་གྱི་ལོ་རྒྱུས་འཕེལ་རིམ་ཁྲོད་རྒྱུན་མཐུད་ཟབ་ཏུ་ཕྱིན་ཡོད། ཉེ་བའི་ལོ་ཤས་རིང་། ཕྱོགས་གཉིས་པོའི་ཐུན་མོང་འབད་བརྩོན་དང་སྐུལ་འདེད་འོག་ཀྲུང་ཁྲའོ་དབར་གྱི་སྲོལ་རྒྱུན་མཛའ་མཐུན་མཉམ་ལས་འབྲེལ་བ་ལོ་རྒྱུས་ཀྱི་དུས་སྐབས་གསར་པར་སླེབས་ཡོད། ཕྱོགས་གཉིས་པོས་འཐབ་ཇུས་སྦྲེལ་མཐུད་ཟབ་ཏུ་གཏོང་བ་དང་། དངོས་སྒྲུབ་མཉམ་ལས་ཟབ་ཏུ་གཏོང་བ། རྒྱལ་སྤྱིའི་ཕྱོགས་མང་ལས་དོན་ཁྲོད་མཐུན་སྦྱོར་གཞོགས་འདེགས་ལ་ཤུགས་སྣོན་རྒྱག་པ། ཀྲུང་ཁྲའོ་འབྲེལ་བ་རྒྱུན་ཆད་མེད་པར་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་པར་བརྟེན། རྒྱལ་ཁབ་གཉིས་པོའི་ཐུན་མོང་གི་ཁེ་ཕན་སྲུང་སྐྱོང་ཐུབ་ཡོད་ལ། ས་ཁུལ་གྱི་ཞི་བདེ་དང་བརྟན་ལྷིང་ཡང་སྲུང་སྐྱོང་ཐུབ་ཡོད།

ཞི་ཅིན་ཕིང་གིས་ནན་བཤད་གནང་དོན། དུས་སྐབས་གསར་པ་དང་དུས་བབ་གསར་པར་ཀྲུང་གོའི་ཏང་དང་སྲིད་གཞུང་གིས་ཐོག་མཐའ་བར་གསུམ་དུ་འཐབ་ཇུས་ཀྱི་མཐོ་ཚད་དང་ཕུགས་ཀྱི་ཟུར་ཚད་ནས་ཀྲུང་ཁྲའོ་དབར་གྱི་འབྲེལ་བར་ལྟ་སྟངས་འཛིན་ཡོད་ལ། ཀྲུང་ཁྲའོ་རྒྱལ་ཁབ་གཉིས་པོའི་སྲོལ་རྒྱུན་མཛའ་གྲོགས་མཉམ་ལས་ཀྱི་འབྲེལ་བ་སྲུང་སྐྱོང་ཡག་པོ་དང་། སྲ་བརྟན་ཡག་པོ། འཕེལ་རྒྱས་ཡག་པོ་བཅས་གཏོང་བ་ནི་ང་ཚོའི་བློ་བརྟན་འགྱུར་མེད་ཀྱི་མཛད་ཕྱོགས་ཤིག་རེད། ཀྲུང་གོ་ཕྱོགས་ཀྱིས་ཁྲའོ་ཞན་ཕྱོགས་དང་མཉམ་དུ་རྒྱལ་ཁབ་གཉིས་དབར་ཕྱི་འབྲེལ་བཙུགས་ནས་ལོ་75འཁོར་བ་དང“ཀྲུང་ཁྲའོ་མཛའ་མཐུན་ལོ”གོ་སྐབས་སུ་བྱས་ཏེ་སྲོལ་རྒྱུན་གྱི་མཛའ་གྲོགས་དར་སྤེལ་གཏོང་བ་དང་། འཐབ་ཇུས་ཐད་ཕན་ཚུན་ཡིད་ཆེས་བྱེད་ཚད་ཟབ་ཏུ་གཏོང་བ། སྤེལ་རེས་མཉམ་ལས་ཟབ་ཏུ་གཏོང་བ་བཅས་བྱས་ནས། ཀྲུང་ཁྲའོ་དབར་གྱི་འབྲེལ་བའི་དུས་བསྟུན་འཕེལ་རྒྱས་ལ་གྲུབ་འབྲས་དེ་བས་ཆེ་བ་ཐོབ་པར་སྐུལ་འདེད་གཏོང་བ་དང་།

(པར་ངོས་གསུམ་པར་གཟིགས)(པར་ངོས་དང་པོར་མཐུད) ཀྲུང་ཁྲའོ་དབར་གྱི་མཛའ་མཐུན་གྱི་ལེའུ་གསར་པ་མཉམ་དུ་རྩོམ་པ། རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་དེ་བས་ལེགས་པ་སྐྲུན་པ་བཅས་བྱས་ཏེ་ས་ཁུལ་གྱི་ཞི་བདེ་བརྟན་ལྷིང་སྲུང་སྐྱོང་ཆེད་ལེགས་སྐྱེས་གསར་པ་རྒྱུན་ཆད་མེད་པར་འབུལ་འདོད་ཡོད།

ཅིན་ཀྲེང་ཨེན་གྱི་རྟེན་འབྲེལ་གློག་འཕྲིན་ནང་བསྟན་དོན། 2024ལོ་ནི་ཁྲའོ་ཀྲུང་དབར་ཕྱི་འབྲེལ་བཙུགས་ནས་ལོ་75འཁོར་བའི་ལོ་ཡིན་པས་དོན་སྙིང་གལ་ཆེན་ལྡན་ཡོད། མིག་སྔར་ཁྲའོ་ཀྲུང་རྒྱལ་ཁབ་གཉིས་ཀ་སྤྱི་ཚོགས་རིང་ལུགས་འཛུགས་སྐྲུན་འཕེལ་རྒྱས་ཀྱི་དུས་མཚམས་གསར་པར་སླེབས་ཡོད་ལ། རྒྱལ་སྤྱིའི་དུས་བབ་རྙོག་འཛིང་ཆེ་ལ་འགྱུར་ལྡོག་ཆེན་པོ་འགྲོ་བཞིན་ཡོད། ཁྲའོ་ཀྲུང་ཏང་གཉིས་དང་རྒྱལ་ཁབ་གཉིས་པོའི་སྲིད་གཞུང་གིས་2024ལོ“ཁྲའོ་ཀྲུང་མཛའ་མཐུན་ལོར”གཏན་འཁེལ་བྱས་ནས་དུས་རབས་ཀྱི་བླང་བྱ་ལྟར། ཁྲའོ་ཀྲུང་དབར་གྱི་སྲོལ་རྒྱུན་མཛའ་མཐུན་མཉམ་ལས་ཀྱི་འབྲེལ་བ་སྔར་བས་འཕེལ་རྒྱས་གཏོང་བ་རྒྱལ་ཁབ་གཉིས་པོའི་མི་དམངས་ཀྱི་ཐུན་མོང་གི་རེ་སྒུག་དང་འདུན་པ་དང་མཐུན་ཡོད། ཁྲའོ་ཀྲུང་དབར་གྱི་མཛའ་གྲོགས་ནི་སྤྱི་ཚོགས་རིང་ལུགས་ཀྱི་འཐབ་རྩོད་ནང་བཙུགས་པ་དང་འབྲེལ་སྲ་བརྟན་དང་འཕེལ་རྒྱས་བྱུང་བ་ཞིག་རེད། ལོ་གསར་པར་ཁྲའོ་ཀྲུང་དབར་གྱི་མཛའ་གྲོགས་བྲག་ལྟར་བརྟན་པའི་རྣམ་པ་གང་ལེགས་མངོན་ངེས་ཡིན་པ་ང་ལ་ཡིད་ཆེས་བརྟན་པོ་ཡོད། ཁྲའོ་ཀྲུང་ཏང་གཉིས་དང་རྒྱལ་ཁབ་གཉིས་ཀྱི་སྲིད་གཞུང་གིས“ཁྲའོ་ཀྲུང་མཛའ་མཐུན་ལོའི”བྱེད་སྒོ་སྤེལ་ནས་ཆབ་སྲིད་དང་། དཔལ་འབྱོར། རིག་གནས་སོགས་ཁྱབ་ཁོངས་ཁག་གི་སྤེལ་རེས་འགྲོ་འོང་ལ་ཤུགས་སྣོན་རྒྱག་པ་དང་། མཛའ་མཐུན་གྱི་བརྩེ་སེམས་ཟབ་ཏུ་གཏོང་བ། མཐུན་སྒྲིལ་གྱི་འབྲེལ་ཐག་དམ་དུ་གཏོང་བ་བཅས་བྱས་ཏེ། ས་ཁུལ་དང་འཛམ་གླིང་གི་ཞི་བདེ་བརྟན་ལྷིང་སྲུང་སྐྱོང་གི་ཐུན་མོང་གི་འཐབ་རྩོད་ནང་མཉམ་ལས་ལ་སྔར་བས་ཤུགས་སྣོན་བརྒྱབ་སྟེ་ཁྲའོ་ཀྲུང་འབྲེལ་བའི་ལེའུ་གསར་པ་རྩོམ་དགོས།

（མཚམས་གཅོད་ཀྱིས་བསྒྱུར། པ་སངས་ཀྱིས་ཞུས）