འདི་ག་ཚགས་པར་ཁང་དུ་རྩེད་ཐང་ནས་ཟླ་1ཚེས་1ཉིན་གློག་འཕྲིན་འབྱོར་གསལ། བརྗོད་དོན་གཙོ་བོའི་སློབ་གསོ་ཁག་གཉིས་པ་སྤེལ་ཚུན། ལྷོ་ཁ་གྲོང་ཁྱེར་གྱིས་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་དང་། གྲོང་སྡོད་བདེ་འཇགས་དོ་དམ་ལ་ཚད་མཐོའི་མཐོང་ཆེན། ལས་བྱེད་པའི་གྲོང་སྡོད་ལས་དོན་གྱི་བདེ་འཇགས་བཅོས་སྒྲིག་དེ་ལས་འགན་གལ་ཆེན་ལ་བརྩིས་ནས་དམ་འཛིན། སྔ་ས་དང་ཆུང་ས་ནས་དམ་འཛིན་དང་རྟག་ཏུ་དང་ཡུན་རིང་དམ་འཛིན་མཐའ་འཁྱོངས་བཅས་བྱས་ནས། གྲོང་སྡོད་ཁྱབ་ཁོངས་ཀྱི་བདེ་འཇགས་ལམ་ལུགས་ཁག་ལ་ནུས་ཤུགས་ཡོད་རྒུས་སྲུང་སྐྱོང་བྱས་པར་ཕན་འབྲས་ཐོན་ཡོད།

བཀོད་སྒྲིག་བྱེད་ཤུགས་ཆེ་རུ་བཏང་ནས་སྐུལ་འདེད་ལ་དམ་འཛིན་བྱས་པ། ལྷོ་ཁ་གྲོང་ཁྱེར་གྱིས་གྲོང་ཁྱེར་ཡོངས་ཀྱི་གྲོང་སྡོད་ཁྱབ་ཁོངས་ཀྱི་བདེ་འཇགས་ལ་ཆེད་དོན་བཀོད་སྒྲིག་བྱས་ནས་བདེ་འཇགས་ཀྱི་འགན་འཁྲི་ནན་དཀྲི་དང་། ལམ་ལུགས་ལ་བརྟེན་ནས་མིར་དོ་དམ་བྱེད་ཤུགས་ཆེ་རུ་གཏོང་བ། བདེ་འཇགས་འདུ་ཤེས་ཀྱི་སློབ་གསོ་གཏོང་ཤུགས་ཆེ་རུ་གཏོང་བ། ཞིབ་བཤེར་མཛུབ་ཁྲིད་ལ་ཤུགས་སྣོན་རྒྱག་པ། ལས་ཀའི་སྤྱོད་ཚུལ་ལེགས་སུ་གཏོང་བ་བཅས་བྱ་ཐབས་ཞིབ་ཕྲ་ཁག་5ཁ་གསལ་བཟོས་པ་དང་། གྲོང་ཁྱེར་ཡོངས་ཀྱི་རྫོང(ཆུས་དང་གྲོང་ཁྱེར)ཁག་གི་གྲོང་སྡོད་ལས་དོན་གྱི་སྤྱི་ཁྱབ་རུ་སྣེ་འཁྲིད་མཁན་དང་། རྨང་གཞི་བརྟན་གཏོང་གཞུང་ལས་ཁང་། གནས་སྐབས་ཏང་ཀྲི་པུའུ་བཅས་ཀྱིས་རྗེས་སྙེག་སྐུལ་འདེད་བཏང་སྟེ་གཞི་རིམ་དུ་བསྐྱོད་དེ་དམ་འཛིན་ཡང་ཡང་བྱས་ནས་བདེ་འཇགས་དོ་དམ་ལམ་ལུགས་ཁག་ཤང(གྲོང་རྡལ)དང་། གྲོང་ཚོ(གྲོང་ལྷན) གྲོང་སྡོད་ལས་བྱེད་པ་མི་སྒེར་བཅས་ལ་དོན་འཁྱོལ་ཐུབ་པའི་འགན་ལེན་བྱས་ཡོད།

བྱ་ཐབས་སྤྱད་ནས་དོན་འཁྱོལ་ལ་དམ་འཛིན་བྱས་པ། ལྷོ་ཁ་གྲོང་ཁྱེར་གྱིས་གྲོང་སྡོད་ཁྱབ་ཁོངས་ཀྱི་བདེ་འཇགས་ཤེས་བྱའི་སློབ་གསོ་ཆེན་པོ་གཏིང་ཟབ་སྤེལ་ཞིང་། རིམ་རྩིས་བྱས་ན་གསོ་སྦྱོང་དུས་ཐེངས་100ལྷག་ཙམ་བྱས་པ་དང་། གྱོད་གཞིར་བརྟེན་ནས་བཅའ་ཁྲིམས་འགྲེལ་བཤད་དང་གྱོད་གཞིར་གཞིགས་ནས་ཉེན་བརྡ་གཏོང་བའི་ཆེད་དོན་ཞིབ་བསྡུར་ཐེངས་230ལྷག་ཙམ་བྱས་པ། གྲོང་སྡོད་ཁྱབ་ཁོངས་ཀྱི་བདེ་འཇགས་དོ་དམ་འགན་འཁྲིའི་ཡི་གེ་2400ལྷག་ཙམ་ལ་མིང་རྟགས་བཀོད་ཡོད། གྲོང་སྡོད་ཁྱབ་ཁོངས་ཀྱི་བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར་ཆེན་པོ་བྱས་ཤིང་། སྒེར་གྱི་རླངས་འཁོར་བཏང་ནས་གྲོང་ཚོར་བཅའ་སྡོད་བྱེད་པ་སོགས་ཕྱོགས་བཞིའི་ཐད་ཀྱི་གནད་དོན་29ལ་དམིགས་ནས་རང་བཤེར་རང་བཅོས་གཏིང་ཟབ་བྱས་པ་དང་། རྫོང(ཆུས་དང་གྲོང་ཁྱེར)12ཚང་མས་འཁོར་རིགས་བཀོལ་སྤྱོད་དོ་དམ་བྱ་ཐབས་དང་འཁོར་རིགས་འགན་སྲུང་དོ་དམ་ཇུས་གཞི་བཏོན་ཡོད། རྒྱ་ཚ་རྫོང་གིས་གུང་ཁང་སྤྱི་སྤྱོད་རླངས་འཁོར་གཉེར་སྐྱོང་ཚད་ཡོད་ཀུང་སི་དང་མཉམ་ལས་བྱས་ཏེ། ལག་ཁྱེར་ཆ་ཚང་བའི་རླངས་འཁོར་10ལ་ཆེད་ལས་ཁ་ལོ་བ་བཀོད་སྒྲིག་བྱས་ནས་སྒྲིག་སྦྱོར་ལམ་སྲོལ་བཙུགས་པ་དང་། ཟངས་རི་རྫོང་གིས་ཝོ་ཏེ་མ་འཇོག་ཚད་ཡོད་ཀུང་སི་དང་རླངས་འཁོར་བོགས་གཏོང་གི་གན་རྒྱ་བཞག་སྟེ། ཆེད་ལས་ཁ་ལོ་བ་7བཏང་བ་དང་རླངས་འཁོར་དོ་དམ་བྱེད་ཤུགས་ཆེ་རུ་བཏང་ནས་གྲོང་སྡོད་ལས་བྱེད་པས་བདེ་འཇགས་ངང་རླངས་འཁོར་སྤྱོད་ཐུབ་པའི་འགན་ལེན་བྱས་ཡོད།

ལྟ་སྐུལ་མཛུབ་ཁྲིད་ནན་པོ་བྱས་ནས་དོ་དམ་ལ་དམ་འཛིན་བྱས་པ། ལྷོ་ཁ་གྲོང་ཁྱེར་གྱིས་གྲོང་སྡོད་ལས་བྱེད་པའི་དགོངས་སྐོར་སྙན་སེང་དང་དགོངས་ཞུ་དང་དགོངས་དུས་ཐིམ་ཞུ་སོགས་ཀྱི་ལམ་ལུགས་སྔར་བས་དོན་འཁྱོལ་ནན་པོ་བྱས་ནས་ལས་གནས་སུ་མེད་པ་སོགས་ཀྱི་གནས་ཚུལ་གཏན་འགོག་བྱས་ཡོད། “གཟའ་འཁོར་རེར་སྙན་སེང་རེ་དང་། ཟླ་རེར་བཀོད་གཏོང་རེ། དུས་ཚིགས་རེར་ཞིབ་བསྡུར་རེ”བྱེད་པའི་ལམ་སྲོལ་འཐུས་སྒོ་ཚང་དུ་བཏང་བ་དང་། བརྙན་ལམ་ཚོགས་འདུའི་ལམ་སྲོལ་འཛུགས་པ། གྲོང་སྡོད་ལས་དོན་རུ་ཁག་གི་རྒྱུན་གཏན་དོ་དམ་དང་། སྒྲིག་ཁྲིམས་ལག་བསྟར། བཅོས་སྒྲིག་དོན་འཁྱོལ་སོགས་ལ་གཟའ་འཁོར་རེར་བཀོད་གཏོང་མཐའ་འཁྱོངས། མི་སྣ་དང་། རླངས་འཁོར། དངོས་ཟོག་བཅས་ཀྱི་བདེ་འཇགས་འགན་ལེན་བཅས་བྱས་ནས་གྲོང་སྡོད་ལས་དོན་གཏིང་ཟབ་དང་ཏན་ཏིག་ཕྱོགས་སུ་སྤེལ་བར་སྐུལ་འདེད་བཏང་ཡོད།

(ཚེ་རིང་བུ་ཁྲིད་ཀྱིས་བསྒྱུར། དཀོན་མཆོག་སྒྲོལ་མས་ཞུས)