འདི་ག་ཚགས་པར་ཁང་དུ་པེ་ཅིང་ནས་ཟླ་1ཚེས་6ཉིན་གློག་འཕྲིན་འབྱོར་གསལ། ཉེ་ཆར། རང་བྱུང་ཐོན་ཁུངས་པུའུ་དང་ཚན་རྩལ་པུས་མཉམ་དུ་བརྡ་ཐོ་བཀྲམ་ནས་2023ལོའི་རྒྱལ་ཁབ་ཀྱི་རང་བྱུང་ཐོན་ཁུངས་ཚན་རིག་ཁྱབ་གདལ་རྟེན་གཞིའི་མིང་ཐོ་ཡོངས་བསྒྲགས་བྱས་ཤིང་། པེ་ཅིང་གྲོང་ཁྱེར་ས་འོག་ཆུའི་ཚན་རིག་ཁྱབ་གདལ་ལྟེ་གནས་སོགས་ཚན་རིག་ཁྱབ་གདལ་རྟེན་གཞི་50ལ་རྒྱལ་ཁབ་ཀྱི་རང་བྱུང་ཐོན་ཁུངས་ཚན་རིག་ཁྱབ་གདལ་རྟེན་གཞིའི་མིང་བཏགས་པ་རེད།

རྒྱལ་ཁབ་ཀྱི་རང་བྱུང་ཐོན་ཁུངས་ཚན་རིག་ཁྱབ་གདལ་རྟེན་གཞི་ནི་རྒྱལ་ཁབ་ཀྱི་ཚན་རིག་ཁྱབ་གདལ་རྟེན་གཞིའི་མ་ལག་ཁྲོད་ཀྱི་གྲུབ་ཆ་གལ་ཆེན་ཞིག་ཡིན་ཞིང་། རང་བྱུང་ཐོན་ཁུངས་ཀྱི་ཚན་རྩལ་གྲུབ་འབྲས་འགྲེམས་སྟོན་དང་། སའི་གོ་ལའི་ཚན་རིག་ཤེས་བྱ་ཁྱབ་གདལ། སྐྱེ་ཁམས་ཤེས་དཔལ་གྱི་འདུ་ཤེས་ཁྱབ་སྤེལ། ཐོན་ཁུངས་གྲོན་ཆུང་དང་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་འདུ་ཤེས་འཛུགས་པ་དར་སྤེལ་བཅས་ཀྱི་གནས་གལ་ཆེན་ཞིག་རེད།

ངོ་སྤྲོད་བྱས་པར་གཞིགས་ན། 2023ལོར། 《རང་བྱུང་ཐོན་ཁུངས་ཀྱི་ཚན་རིག་ལག་རྩལ་ཁྱབ་གདལ་གྱི“ལོ་ལྔ་ཚན་བཅུ་བཞི་པའི”ལས་ཀའི་ཇུས་གཞི》གཞིར་བཟུང་། རང་བྱུང་ཐོན་ཁུངས་པུས་ཚན་རྩལ་པུའུ་དང་མཉམ་དུ་རྒྱལ་ཁབ་ཀྱི་རང་བྱུང་ཐོན་ཁུངས་ཚན་རིག་ཁྱབ་གདལ་རྟེན་གཞི་ཁག་གསར་པའི་འོས་སྦྱོར་མིང་འདོགས་ཀྱི་ལས་དོན་སྤེལ་འགོ་ཚུགས་པ་དང་། འདི་ནི་རང་བྱུང་ཐོན་ཁུངས་པུའུ་བཙུགས་ཚུན། རྒྱལ་ཁབ་རིམ་པའི་ཚན་རིག་ཁྱབ་གདལ་རྟེན་གཞི་འཛུགས་ཐེངས་དང་པོ་ཡིན་པ་དང་། ས་གནས་ཁག་གི་རང་བྱུང་ཐོན་ཁུངས་གཙོ་གཉེར་སྡེ་ཚན་དང་ཁོངས་གཏོགས་ཚན་པའི་འདུན་ཞུའི་ཧུར་སེམས་ཆེན་པོ་ཡོད་ཅིང་། ཁྱོན་ཚན་རིག་ཁྱབ་གདལ་རྟེན་གཞི་127ལ་ཞིབ་བཤེར་རགས་ཙམ་ཐུབ་ཡོད། ད་ཐེངས་ཡིག་ཐོག་སྙན་ཞུ་ཕུལ་བའི་ཚན་རིག་ཁྱབ་གདལ་རྟེན་གཞི་མང་ཆེ་བ་ནི་དེ་སྔའི་རྒྱལ་ཁབ་ས་ཆ་དང་། རྒྱ་མཚོ། ཐིག་ལེན་རིས་འབྲིའི་ཚན་རིག་ཁྱབ་གདལ་རྟེན་གཞི་བཅས་ཡིན་པ་དང་། འཛུགས་སྐྲུན་གྱི་རྨང་གཞི་ཡོངས་ཁྱབ་ཡག་པོ་ཡོད་པས་ཚན་རིག་ཁྱབ་གདལ་གྱི་བྱེད་སྒོ་སྤེལ་བ་དང་སྤྱི་དམངས་ལ་ཞབས་འདེགས་ཞུ་བ་སོགས་ཀྱི་ཐད་དཔེ་སྟོན་སྣེ་ཁྲིད་ཀྱི་ནུས་པ་ཐོན་ཡོད། རྒྱལ་ཁབ་ཀྱི་རང་བྱུང་ཐོན་ཁུངས་ཚན་རིག་ཁྱབ་གདལ་རྟེན་གཞིའི་ཞིབ་དཔྱད་ཚད་གཞི་གཞིར་བཟུང་ད་ཐེངས་རྟེན་གཞི་80ལ་མིང་བཏགས་ཡོད། དེའི་ནང་པེ་ཅིང་གྲོང་ཁྱེར་ས་འོག་ཆུའི་ཚན་རིག་ཁྱབ་གདལ་ལྟེ་གནས་དང་། ཀྲང་ཅ་ཁོའུ་ས་གཤིས་རྟེན་མཛོད་ཁང་། ཏ་ཐུང་བྲུ་རོང་ས་གཤིས་སྤྱི་གླིང་སོགས་ཚན་རིག་ཁྱབ་གདལ་རྟེན་གཞི་50ལ་རྒྱལ་ཁབ་ཀྱི་རང་བྱུང་ཐོན་ཁུངས་ཚན་རིག་ཁྱབ་གདལ་རྟེན་གཞིའི་མིང་བཏགས་ཡོད། དེ་དང་ཆབས་ཅིག ཧོ་པེ་ཞིང་ཆེན་རང་བྱུང་ཐོན་ཁུངས་ཚན་རྩལ་ཁང་སོགས་ཚན་རིག་ཁྱབ་གདལ་རྟེན་གཞི་30ལ་རང་བྱུང་ཐོན་ཁུངས་པུའི་ཚན་རིག་ཁྱབ་གདལ་རྟེན་གཞིའི་མིང་བཏགས་ཡོད་པ་རེད།

ཤེས་རྟོགས་བྱུང་བར་གཞིགས་ན། བརྡ་ཐོའི་ནང་། ཚན་རིག་ཁྱབ་གདལ་རྟེན་གཞི་ཁག་གིས་སྤྱི་ཕན་རང་བཞིན་དང་། སྒོ་དབྱེའི་རང་བཞིན། དཔེ་སྟོན་རང་བཞིན་བཅས་ཀྱི་ཁྱད་ཆོས་མངོན་གསལ་དོད་པོ་ཡོང་བར་བྱས་ནས་ཚན་རིག་ཁྱབ་གདལ་རྟེན་གཞི་འཛུགས་སྐྲུན་བྱེད་ཤུགས་མུ་མཐུད་ཆེ་རུ་གཏོང་བ་དང་། ཚན་རིག་ཁྱབ་གདལ་རྟེན་གཞིས་བར་མཐོངས་འཆར་འགོད་དང་། ས་ཞིང་བཅོས་སྒྲིག རྒྱ་མཚོའི་སྐྱེ་ཁམས། ཐིག་ལེན་རིས་འབྲིའི་ས་ཁམས་ཆ་འཕྲིན། ས་གཤིས་ཆགས་ཚུལ། རང་བྱུང་ཤུལ་བཞག་སོགས་ཀྱི་མཛེས་ལྗོངས་དང་ཚན་རྩལ་གསར་གཏོད་ཀྱི་གྲུབ་འབྲས་འགྲེམས་སྟོན་བྱེད་པར་ཁྲིད་སྟོན། ཚན་རིག་ཁྱབ་གདལ་གྱི་བྱེད་སྒོ་སྤེལ་རྒྱུ་ཇུས་འགོད། ཚན་རིག་ཁྱབ་གདལ་གྱི་ཞབས་ཞུའི་ནུས་པ་རྒྱུན་ཆད་མེད་པར་ཆེ་རུ་གཏོང་བ་བཅས་བྱས་ནས། རང་བྱུང་ཐོན་ཁུངས་ཀྱི་ཚན་རིག་ཤེས་བྱ་ཁྱབ་གདལ་གཏོང་བ་དང་། སྤྱི་དམངས་ཀྱི་རང་བྱུང་ཐོན་ཁུངས་ཚན་རིག་བྱང་ཚད་མཐོ་རུ་གཏོང་བ། སྤྱི་དམངས་ཀྱི་སྐྱེ་ཁམས་ཤེས་དཔལ་འདུ་ཤེས་ཟབ་ཏུ་གཏོང་བ་བཅས་ལ་ལེགས་སྐྱེས་གསར་པ་དེ་བས་ཆེ་བ་འབུལ་དགོས་པ་བཏོན་ཡོད་པ་རེད།

（བསོད་ནམས་དཔའ་མོས་བསྒྱུར། པ་ཚེས་ཞུས）