མཛེས་པའི་ཡར་འབྲོག་གཡུ་མཚོའི་འགྲམ་ངོཌ་སུ། །
སྐྱིད་པའི་ཡར་འབྲོག་སྒང་སྡེའི་ཕ་ཡུལ་ཆགས། །
སྲིད་པའི་མཚོ་མོ་ཡུལ་གྱི་རྒྱན་ཆ་ཡིན། །
སེམས་པ་འདི་ལ་ཆགས་ནས་ཡུན་རིང་འགོར། །
སྲིད་པའི་རི་བོ་གནོད་སྦྱིན་གང་བཟང་སོགས། །
མཐའ་བཞི་གངས་ཀྱི་ར་བས་ཡོངས་སུ་བརྒྱན། །
རྔམ་བརྗིད་ཡིད་དབང་འཕྲོག་པའི་ཕ་ཡུལ་མཛེས། །
སེམས་པ་འདི་ལ་ཆགས་ནས་ཡུན་རིང་འགོར། །
སྣ་བརྒྱའི་མེ་ཏོག་གང་སར་བཞད་པ་ཡི། །
རྩྭ་ཆུ་ཀུན་བཟང་བདེ་སྐྱིད་ཕ་ཡུལ་ཆགས། །
སྲིད་པའི་སྤང་གཤོངས་རྐ་གླིང་བ་ཆོས་ཐང་། །
སེམས་པ་འདི་ལ་ཆགས་ནས་ཡུན་རིང་འགོར། །
མི་རྣམས་མཐུན་ལ་ཡ་རབས་གོམས་སྲོལ་བཟང་། །
རིག་དངོས་ཤུལ་བཞག་མང་པོ་འོད་བཞིན་འཚེར། །
ཆོས་འཁོར་ལྷ་མོ་ཁ་རག་བྲོ་གར་སོགས། །
སེམས་པ་འདི་ལ་ཆགས་ནས་ཡུན་རིང་འགོར། །
བརྩེ་བ་ལྷད་མེད་ཚེ་གང་གཏན་གྱི་གྲོགས། །
སེམས་བཟང་ཡར་འབྲོག་བུ་མོའི་ཕ་ཡུལ་ཆགས། །
ཡིད་འོང་ཡར་འབྲོག་སྒང་པའི་བུ་མོ་མཛེས། །
སེམས་པ་འདི་ལ་ཆགས་ནས་ཡུན་རིང་འགོར། །