འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། “ལྗོངས་ཡོངས་ཀྱི་རིམ་པ་ཁག་དང་། སྡེ་ཚན་ཁག དེ་བཞིན་རྒྱ་ཆེའི་ཏང་ཡོན་ལས་བྱེད་པ་བཅས་ཀྱིས་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་དང་། ལས་ཀའི་ཞན་ཆ་སེལ་བ། དམ་པ་དོན་གཉེར། དངོས་འཛིན་དངོས་སྒྲུབ་བཅས་བྱས་ནས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་ཀྱི་ལས་ཀའི་བླང་བྱ་ཇི་མ་ཇི་བཞིན་དོན་འཁྱོལ་བྱས་ཏེ། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ལས་དོན་གཏིང་ཟབ་ཕྱོགས་སུ་སྤེལ་རྒྱུར་སྐུལ་འདེད་ཟམ་མི་ཆད་པ་གཏོང་དགོས” ཟླ་2ཚེས་19ཉིན། རང་སྐྱོང་ལྗོངས་ཏང་ཨུད་ཀྱི་སྤྱོད་ཚུལ་སྔར་བས་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ལས་དོན་སྐུལ་སྤེལ་ཚོགས་འདུ་ལྷ་སར་འཚོགས་པ་དང་། ཚོགས་འདུའི་བརྗོད་དོན་གཙོ་བོ་ཁ་གསལ་བ་དང་། ནང་དོན་ཕུན་སུམ་ཚོགས་པ། བཀོད་སྒྲིག་ཚགས་ཚུད་པ་བཅས་བྱས་ཡོད་པས་རང་ལྗོངས་ཀྱི་ཏང་ཡོན་ལས་བྱེད་པའི་ཁྲོད་ཚུར་སྣང་ལན་ཆ་ཆེན་པོ་བྱུང་ཞིང་། ཚང་མས་ཆབ་སྲིད་ཀྱི་ཚུགས་གནས་མཐོ་རུ་དང་ཆབ་སྲིད་ཀྱི་རང་རྟོགས་ཆེ་རུ་བཏང་སྟེ། ནམ་ཡང་ཚར་དུས་མེད་པའི་སྙིང་རུས་དང་བརྩོན་སེམས་ལ་བརྟེན་ནས་སྤྱོད་ཚུལ་འཛུགས་སྐྱོང་ལ་དམ་འཛིན་ཡག་པོ་བྱེད་ཀྱི་ཡིན་ཞེས་གཅིག་རྗེས་གཉིས་མཐུད་ངང་བཤད།

ཧྲུའུ་ཅི་ཝང་ཅུན་ཀྲེང་གིས་གསུང་བཤད་གནང་སྐབས། སློབ་སྲོལ་དར་སྤེལ་ཤུགས་ཆེན་བཏང་སྟེ་སློབ་སྦྱོང་ནན་ཏན་དང་ཡིད་ཆེས་བརྟན་གཏོང་ཁྲོད་ཕུགས་བསམ་དད་སེམས་བརྟན་དུ་གཏོང་བ་དང་། ཐོས་བསམ་མྱོང་རྟོགས་ཁྲོད་ཐོག་མའི་བསམ་འདུན་བློ་ལ་བརྟན་པོར་འཆང་བ། ཞིབ་བསྡུར་དང་ལག་བསྟར་ཁྲོད་རང་ཉིད་ལ་སྦྱོང་བརྡར་ཟམ་མི་ཆད་པར་སྤྲོད་པ། ཤེས་སྦྱོར་གཅིག་མཐུན་ཁྲོད་རང་འགུལ་ངང་ཐེག་པ་ཁུར་ལེན་ཐུབ་པ་བཅས་བྱས་ཏེ་སྦྱངས་པ་གོ་ཆོད་དང་། བེད་སྤྱད་ནས་སློབ་སྦྱོང་ལ་སྐུལ་འདེད། སྦྱངས་སྤྱོད་ཟུང་འབྲེལ་བཅས་ཡོང་བ་བྱེད་དགོས་པའི་ནན་བཤད་གནང་བ་རེད།

ཧྲུའུ་ཅི་ཝང་ཅུན་ཀྲེང་གིས་གསུང་བཤད་གནང་སྐབས། རིམ་ཁག་ཏང་ཨུད་ཀྱིས་འགན་འཁྲི་སྔར་བས་ཁ་གསལ་དང་བྱེད་ཐབས་གསར་གཏོད་ཀྱིས་རྒྱུན་འཁྱོངས་ལྷོད་མེད་ངང་སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱས་ཏེ་ལས་དོན་དོན་འཁྱོལ་སྔར་བས་ཡག་པོ་ཡོང་བར་སྐུལ་འདེད་གཏོང་དགོས་པའི་ནན་བཤད་གནང་བ་རེད།

མཐའ་མཚམས་བརྟན་ལྷིང་སྲུང་སྐྱོང་གི་འཐབ་ས་དང་པོར་གནས་པའི་གྲོ་མོ་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་སུ་ཏང་ཨུད་ཚན་ཁག་གི་ཁོངས་མིས་འཕྲལ་དུ་ཚོགས་འདུའི་དགོངས་དོན་སློབ་སྦྱོང་བྱས་ནས་2024ལོའི་ལས་ཀའི་ཤུགས་རྒྱག་ས་གཙོ་བོ་ཁ་ཕྱོགས་ཁ་གསལ་བཟོས་པ་རེད། “སྤྱོད་ཚུལ་ནི་ཏང་སྲོལ་དང་། སྲིད་སྲོལ། ཉེན་སྲོལ་བཅས་ཀྱི་གཅིག་བསྡུས་ཀྱི་མཚོན་ཚུལ་ཞིག་རེད” གྲོ་མོ་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་ཀྱི་ཏང་ཨུད་ཧྲུའུ་ཅི་གཞོན་པ་དང་ཆབ་སྲིད་ཨུ་ཡོན་ཕུར་བུ་ཚེ་རིང་གིས། གོམ་སྟབས་རྗེས་མར་གྲོ་མོ་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་ཀྱིས་སྤྱོད་ཚུལ་ལེགས་སུ་གཏོང་རྒྱུ་དེ་ཚད་བརྒལ་སར་བརྩིས་ནས“མཐའ་སྟོབས་དང་། མཐའ་བརྟན། མཐའ་དར། དམངས་ཕྱུག”བཅས་ཀྱི་འཐབ་ཇུས་དམིགས་ཚད་མཉམ་འདྲེས་གཏིང་ཟབ་བྱས་ཏེ། སྲ་ཞིང་བརྟན་པའི་ཏང་སྲོལ་ལ་བརྟེན་ནས་ཏང་སེམས་དང་དམངས་སེམས་གཅིག་ཏུ་འགྲིལ་བ་དང་། ཉེན་རྟོག་པའི་སྤྱོད་ཚུལ་ནན་པོར་བརྟེན་ནས་སྤྱི་ཚོགས་ཀྱི་གོམས་སྲོལ་ལ་སྐུལ་འདེད་གཏོང་བ། མཐའ་མཚམས་ཞིབ་བཤེར་གྱི་ལས་འགན་ལྕི་པོར་བརྟེན་ནས་འགན་འཁྲི་འཁུར་བ་བཅས་བྱས་ཏེ་བཅའ་སྡོད་བྱ་ཡུལ་གྱི་དཔལ་འབྱོར་འཕེལ་རྒྱས་ལ་སེམས་ནུས་ཡོད་རྒུས་རམ་འདེགས་བྱེད་ཀྱི་ཡིན་ཞེས་བཤད།

（དཔའ་མོ་དང་ཚེ་རིང་བུ་ཁྲིད་ཀྱིས་བསྒྱུར། ཉི་དོན་གྱིས་ཞུས）