བསོད་ནམས།
ཀ་སོགས་སྡེབ་སྦྱོར་སྙན་ངག་རྩོམ་མཁས་པ། །
ཁ་བཤད་དོན་སྨིན་འབྲས་བཟང་ལེན་ཐུབ་མཁན། །
ག་སར་མཁོ་བ་ནོར་བུའི་མཚན་ཉིད་ཅན། །
ང་རང་དགའ་ས་སྐྱེ་བོ་དེ་ཚོའི་གྲས། །
ཅ་ནེ་འཛུགས་ས་ལེགས་ཙམ་རག་མ་ཐག །
ཆ་རྐྱེན་ཚང་བྱེད་རིག་གནས་སྦྱངས་པ་དག །
ཇ་ཆང་ལོངས་སྤྱོད་ཁྲོད་དུ་བསྐྱུར་བ་ཡི། །
ཉ་མོ་སྲོག་བྲལ་འདྲ་བར་བདག་མི་དགའ། །
ཏ་ལེར་གསལ་བའི་ཤེས་བྱར་མཐོང་ཆེན་པོས། །
ཐ་སྙད་མ་ལུས་ཁོང་དུ་ཆུད་ཐབས་ཀྱིས། །
ད་ལྟ་བལྟས་ཀྱང་མི་ངོམས་སླར་བལྟ་བའི། །
ན་གཞོན་ཕོ་མོ་ཁོ་བོའི་དགའ་ས་ཉིད། །
པ་ཕའི་མཚན་སྙན་རང་ལ་འདོད་བཞིན་དུ། །
ཕ་མེས་བཟང་པོའི་རིག་གནས་དྭངས་གཙང་ཆབ། །
བ་ཚྭའི་མཚོ་ཆུར་བརྩི་བའི་བླུན་རྨོངས་དག །
མ་རྩ་གཏོར་མཁན་ཁོ་བོའི་མི་དགའ་ས། །
ཙ་ན་ཀ་ལྟར་བློ་ནུས་ཤུགས་སྒྲིམ་གྱིས། །
ཚ་ཁ་མ་འཆོལ་ཚད་མའི་སྤུ་གྲི་རྣོ། །
ཛ་ལང་སྤྱོད་ཡན་མ་རུངས་ལོག་རྟོག་ཅན། །
ཝ་སྐྱེས་སྡར་མར་བསྣུན་པར་ཁོ་བོ་དགའ། །
ཞ་ཉེ་མཉེན་པོ་གར་འཐེན་གུག་པ་ལྟར། །
ཟ་འཐུང་ཅི་ཞིག་ཐོབ་འཕྲལ་དེ་ཕྱོགས་སུ། །
འ་ཡོ་ཤ་ཡི་རྗེས་སུ་བསྙེགས་འདྲ་བ། །
ཡ་ཡོའི་བློ་དམན་ཁོ་བོའི་མི་དགའ་ས། །
ར་གན་གསེར་དུ་འཁྲུལ་མཁན་མ་ཡིན་པར། །
ལ་ཤན་འབྱེད་པར་རྣམ་དཔྱོད་ཆེས་ཡངས་ཤིང་། །
ཤ་ཁྲག་རུས་ལས་གྲུབ་པའི་ལུས་པོ་འདིས། །
ས་སྟེང་བྱ་བཟང་སྒྲུབ་མཁན་བདག་དགའ་ས། །
ཧ་མ་གོ་ལ་གོ་མདོག་གྲུང་མདོག་དང་། །
ཧ་བེ་ཧོ་བེའི་འཇོན་ཐང་རྫུན་མ་ཡིས། །
ཨ་ཁ་ཟེར་དགོས་རང་གིས་བཟོས་པའི་མཐར། །
ཨ་མ་འབོད་མཁན་ཁོ་བོ་མི་དགའ་ས། །
བརྗོད་དོན་སྒོ་འབྱེད་གསལ་བྱེད་སུམ་ཅུའི་ཀ །
ཀ་ཡིས་སྣེ་ཁྲིད་ནང་དོན་སྙན་པའི་ཁ། །
ཁ་གཏིང་རྙོག་བྲལ་དྲང་གཏམ་ཆུ་གངྒ། །
ག་བྱས་ལྟ་ཙམ་བགྱིས་ཀྱང་བླང་དོར་རྙེད། །