རྫི་གླུ།
སྔ་དྲོ་ལུག་ཁྱུ་རི་ལ་འགྲོ །
རི་ལ་ཁ་བ་གཡོགས་པ་འདྲ། །
ང་རྫི་བོ་རི་མགོའི་དར་ལྕོག་འདྲ། །
ཉིན་དགུང་ལུག་ཁྱུ་སྤང་ལ་སྡོད། །
སྤང་ལ་སེར་བ་བབས་པ་འདྲ། །
ང་རྫི་བོ་སྤང་རྒྱན་མེ་ཏོག་འདྲ། །
དེ་ནས་ལུག་ཁྱུ་ཆུ་ལ་བབས། །
ཆུ་ལ་ངང་པ་རོལ་བ་འདྲ། །
ང་རྫི་བོ་ཉ་ཆུང་གསེར་མིག་འདྲ། །
དེ་ནས་ལུག་ཁྱུ་ཐང་ལ་འགྲོ །
ཐང་ལ་རྩིས་རྡེའུ་བཀྲམ་པ་འདྲ། །
ང་རྫི་བོ་རྩིས་པ་མཁས་པ་འདྲ། །
དགོང་དྲོ་ལུག་ཁྱུ་ལྷས་ལ་འཇུག །
ཁྱི་དོམ་ཆུང་ལྷས་ཀྱི་སྒོ་ལྕགས་རེད། །
སྒོ་རྡོ་ལྷས་ཀྱི་ལྡེ་མིག་འདྲ། །
ང་རྫི་བོ་ནང་གི་ནོར་བུ་རེད། །
འཛུགས་ཤའི་བཤད་པ།
འཛུགས་པ་མི་ཟེར་ཚུགས་པ་ཟེར། །
མི་རྒྱུད་རྩ་བ་ཚུགས་པ་ཟེར། །
རྐང་པ་མི་ཟེར་ཁེངས་པ་ཟེར། །
བང་མཛོད་ནོར་གྱིས་ཁེངས་པ་ཟེར། །
གཞུ་གུ་མི་ཟེར་བཞུགས་པ་ཟེར། །
བཞུགས་གྲལ་དཀྱིལ་དུ་བཞུགས་པ་ཟེར། །
མཚང་ར་མི་ཟེར་ཚང་བ་ཟེར། །
རྒྱུ་ནོར་ཚང་བའི་ཚང་བ་ཟེར། །
སྐེད་པ་མི་ཟེར་སྐྱེས་པ་ཟེར། །
བུ་སྐྱེས་སྐྱེས་པའི་སྐྱེས་པ་ཟེར། །
ལོང་མི་ཟེར་ལྷོངས་ཟེར། །
ལོངས་སྤྱོད་ཆང་ལ་བརྟེན་པའི་ལྷོངས་ཟེར། །
རྩིབ་མ་མི་ཟེར་རྩིག་པ་ཟེར། །
ཇ་སྒམ་བརྩིགས་པའི་རྩིག་པ་ཟེར། །
སོག་མ་མི་ཟེར་གསོག་པ་ཟེར། །
རྒྱུ་ནོར་བསགས་པའི་གསོག་པ་ཟེར། །
མཇིང་པ་མི་ཟེར་འགྱིངས་པ་ཟེར། །
སྡང་དགྲ་བོའི་སྟེང་དུ་འགྱིངས་པ་ཟེར། །